Testo Quali Hè Chì Sà ?

Quali hè chì sà, com'idda nasci
Com'idda stà, com'idda pasci
Com'idda pesa o si ni vola
Com'idda ghjoca, è si vultola
È dici dolu o alegria
A noscia vechja puesia.

Quali hè chì sà duv'iddu porta U passa è vena di a sporta
Da u me cori spatansciatu
À u to sintimu addinatu
Da a me penna in chjostru beddu
À l'indrizzu sempri quiddu

Quali hè chì sà chì u nosciu scrivi
Ùn sia ma' chè modu vivi
U veru fiatu è u rispiru
U solcu fattu à tondu ghjiru
Da aiutà ci à scurdà l'anni
È à guarì mezu l'affanni

Allora scrivi è dì li à u celi
I centu versa di u to vangeli Issi tema tinti à u pinneddu
Scelti è parolli à u criveddu
Da allibrà la via via
Quidda nustrali puesia.